Тропарь, глас 1:
Милостивая Дево обители Киккския похвала /Иже на руках Твоих яко младенец/Иисуса моли за поклоняющихся святому и всечестному иконы Твоея образу,/ подающи прегрешений свобождение, и прошений исполнение. /како чтим во веки Мати величия Твоя// Славу приносяще Богу тако Тя возвеличевшему.
Кондак, глас 4:
Источник милости Милостивая/Тя познавши яко роди Бога Милующего,/святую икону Твою лобызаем,/ юже Лука духоносный изобрази,/и обогатися остров Кипр яко сокровищем,/тако восклцающе: радуйся// Мати Киккская.
Величание:
Величаем Тя,/Пресвятая Дево/ Богоизбранная Отроковице/и чтим образ Твой святый,/ имже точиши исцеления//всем с верою притекающим.
АКАФИСТ
Пресвятей Богородице в честь иконы Ея Милостивая (Киккская)
Дни памяти – 12/25 ноября и 26 декабря /8 января
Кондак 1
Избранная от всех родов Дево Мати Господа Бога Вышняго, в лучезарней славе небесней превыше Херувимов и Серафимов Царице Владычице, приклони милость Твою к нам грешным, утоли печаль сердец наших; простри над нами покров Твой честный, посети скорбную жизнь нашу, не имамы бо иныя помощи, не имамы бо иныя надежды разве Тебе, Мати рода нашего. В страхе и в трепете пред величием милосердия Твоего, коленопреклонше, ходатайства Твоего пред безсмертным Сыном Твоим просим, со умилением зовущее:
Радуйся, Милостивая Мати Божия, милости Твоя на нас изливающая.
